Конкурс "Учитель года Западной Якутии - 2016"
Кулун тутар 11-13 күннэригэр Yөһээ Бүлүү 4 №-дээх оскуолатын базатыгар улуустар икки ардыларынааҕы учууталлар профессиональнай таһымнарын тургутар, общественность билиниитин быһаарар, «Алмазэргиэнбанк» тэрилтэни өр кэмӊэ салайан олорбут Миронов Александр Степанович сырдык кэриэһигэр анаммыт «Учитель года Западной Якутии - 2016» диэн улухан конкурс буолан ааста. Yөһээ Бүлүүгэ бу конкурс 4 төгүлүн ыытыллар. Бу конкурсу 4 сыллаҕыта Yөһээ Бүлүү4 №-дээх оскуолатын директора, учууталлар Республикатааҕы конкурстарын кыайыылааҕа, Россияҕа ыытыллар «Учитель года России» конкурс финалиһа Кынатов Юрий Васильевич сүүрэн-көтөн, тэрийэн саҕалаабыта. Ол саҕаттан бу ыытыллар конкурс географията улахана, таһыма үрдүгэ үгүс дьон билиниитин ылбыта. Сылын аайы ыытыллар «Учитель года Западной Якутии» конкурска, быраабыла курдук, жюри састаабыгар «Учитель года России» кыайыылаахтара кэлэн дьүүллүүр сүбэ састаабыгар үлэлииллэр, аһаҕас уруоктары биэрэллэр, маастар-кылаастары ыыталлар, дискуссия арааһын тэрийэллэр. Ону таһынан кинилэри кытта тэӊӊэ биһиги Республикабыт бастыӊ учууталлара, араас конкурстар кыайыылаахтара тэӊӊэ сылдьан үлэлииллэр, күрэхтэһиини ыытыһаллар. Бу конкурска аатын курдук арҕаа регион учууталлара эрэ буолбакка, республикабыт араас муннуктартан кэлэн кыттан бараллар. Онон Yөһээ Бүлүүгэ ыытыллар конкурс республиканскай таһымнаах буола үүннэ диэтэхпитинэ сыыспаппыт буолуо.
Быйыл даҕаны 12 киһилээх дьүллүүр сүбэ састаабыгар бааллар Россия бастыӊ учууталлара, «Учитель года России - 2015» конкурс кыайыылааҕа, Ленинградскай уобулас Гатчина куоратын учуутала Рочев Д.И., ити конкурс лауреата, Башкортостан Уфа куоратын математикаҕа учуутала Рожина Р.Р., Улуу Новгород математикаҕа учуутала, «Образование» национальнай проект кыайыылааҕа Васильева И.В., «Учительская газета» редакторын солбуйааччыта уонна корреспондена, Москва куораттан Родионова О.А., республикабыт «Учитель года» конкурстарын араас сылларга кыайыылаахтара. Ити Улахан дьүүллүр сүбэ састаабыгар биһиги улуустан киэн туттар учууталбыт Республиканскай «Учитель года - 2012» конкурс кыайыылааҕа, «Учитель года России - 2013» конкурс кыттыылааҕа Ушканов Ф.Ф. сылдьыста.
Конкурска Ньурба, Сунтаар, Бүлүү, Yөһээ Бүлүү, Нам, Горнай, Таатта улуустарыттан барыта 11 кыттааччы баар. Ньурбаттан 3 №-дээх начальнай оскуола учуутала Апросимова Туйаара Сергеевна уонна Ньурбатааҕы техническэй лицей информатикаҕа учуутала Федоров Артур Юрьевич кыттыыны ыллылар.
Конкурс маӊнайгы күнүгэр күрэхтэһээччилэр бэйэни билиһиннэрэр визиткаларын көрүү буолла, ол кэннэ Россия бастыӊ учууталлара араас көрүӊнээх аһаҕас уруоктары биэрэннэр, маастар-кылаастары ыытаннар күн олох биллибэккэ ааста. Сарсыныгар күрэхтэһээччилэргэ ыарахан күн буолла, ол курдук кинилэр конкурска кыттар уруоктарын улахан дьүллүүр сүбэ иннигэр ыыттылар, ону ырыттылар. Кыттааччылар бэлэмнээхтэрэ, билиилээхтэрэ көстөр, ол курдук араас интэриэһинэй уруоктар бардылар, оҕолор даҕаны наһаа астыннылар. Конкурс бүтэһик күнүгэр кыттааччылар күн маннайгы аӊарыгар бары маастар-кылаастары ыыттылар, эбиэт кэннэ «Учуутал профессиональнай таһымын үрдэтии – эн көрүүгүнэн» диэн темалаах аһаҕас дискуссияҕа кытыннылар. Дискуссияны дьүллүүр сүбэ иилээн саҕалаан ыытта.
Ханнык баҕарар күрэххэ саамай долгутуулаах түгэнинэн түмүк таһаарыыта буолар. Ол курдук улахан дьүллүүр сүбэ чилиэннэрэ бэйэлэрин сүбэлэрин – амаларын, баҕа санааларын тиэрдибиттэрин кэннэ кыайыылаахтары билиһиннэрии буолла.
Россия биир улахан суолталаах «Учительская газета» анал бирииһинэн 2 киһи наҕараадаламмытыттан биирин «Yчүгэй таһымнаах уруок» диэн номинациянан Ньурба 3 №-дээх оскуолатын учуутала Апросимова Туйаара Сергеевна ылан үөрүүбүт үрдээтэ.
Уопсай түмүккэ 3-с миэстэни Таатта лицейин биологияҕа учуутала Данилова Мария Прокопьевна, 2-с миэстэни Yөһээ Бүлүү 4 №-дээх оскуолатын саха тылын уонна литературатын учуутала Егорова Зинаида Евсеевна ыллылар. Конкурс абсолютнай кыайыылааҕынан улахан конкурстарга кыттан элбэх кыайыыны ситиспит, төһө да эдэрин иһин кэскиллээх, иннигэр эрэллээх Бэрдьигистээх оскуолатын математикаҕа учуутала Павлов Ньургун Михайлович тахсан үөрүү өрөгөйүн биллэ.
Түмүктээн эттэххэ буолан ааспыт конкурс үрдүк таһымнааҕын конкуруһу үөрүүлээхтик аһыы кэмигэр Саха Республикатын Yөрэҕириитин миниистирин солбуйааччытта Гуляев Василий Васильевич чорботон туран бэлиэтээтэ, кэлбит ыалдьыттар эмиэ күрэхтэһи хаамыытын, тэрийээһинин үрдүктүк сыаналаатылар.
Бу маннык үрдүк таһымнаах конкурстар, күрэхэһиилэр учуутал бэйэтин кыаҕын билэ үөрэнэригэр, кини өссө сайдарыгар, үүнэригэр улахан тоһүү күүс буолаллар. Бу да сырыыга ол курдук кыттыбыт учууталлар, кинилэри арыаллабыт коллегалара Россия, респбулика бастыӊ үлэлээх учууталларын кытта ыкса билистилэр, элбэххэ үөрэннилэр, бэйэлэригэр опыт ыллылар, учуутал идэтин сөпкө талбыттарын өссө төгүл бигэргиттилэр, инники үлэлэригэр эрэллээх үөрэн-көтөн тарҕастылар.
Охлопкова Е.Г.
Ньурба 3 №-дээх начальнай оскуолатын учуутала,
МО салаайааччыта |