Толкуйдаа, оонньоо, кыай!
Ийэ тыл уонна сурук-бичик ыйын чэрчитинэн, сахалыы алпаабыты төрүттээбит, бастакы лингвист-учуонай Сэмэн Ноҕоруодап 125 сылын көрсө, олунньу 11 күнүгэр оскуолабыт дьиэ кэргэттэрин ортолоругар «ТОК» күрэх буолан ааста. Уопсайа 9 дьиэ кэргэн 5 түһүмэххэ күөн көрүстэ. Үөрүүлээҕэ диэн аҕалар кэлэн эмиэ көхтөөх кыттыыны ыллылар.
Бастакы түһүмэххэ араас таһымнаах боппуруостарга эппиэттээтилэр. Саха сирэ, айылҕа, саха киһитин олоҕо-дьаһаҕа, сиэрэ-майгыта, саха суруйааччылара, ырыаһыттара, спортсменнара уонна да атын тиэмэлэргэ өйдөрүн – билиилэрин тургутан көрбүттэрэ.
Иккис түһүмэҕинэн өс хоһооннору сааһылаан сөпкө наардаатылар. Онтон салҕыы саха норуодунай суруйааччыларын таайдылар, ырыа ыллаатылар, хоһоон айарга холоннулар. Айар куттаах, суруйар дьоҕурдаах дьиэ кэргэттэр олус хомоҕой хоһоон суруйбуттар.
Ити курдук үөрэ-көтө күрэхтэһэн, тэрээһиммит олус сэргэхтик ааста. Кыайыылаах үрдүк аатын Григорьевтар дьиэ кэргэттэрэ сүктүлэр, 3 «А» кылаастан. Иккис миэстэҕэ 1 «А» кылаас дьиэ кэргэнэ Слепцовтар таҕыстылар. Үһүс бочуоттаах миэстэни 1 «В» кылаас аатыттан Петровтар ыллылар.
Кыайыылаахтары өссө төгүл истиҥник эҕэрдэлиибит! Кыттыбыт дьиэ кэргэттэргэ кэлэн көхтөөх кыттыыны ылбыккытыгар махтанабыт. Баҕарабыт тиит мас курдук кытаанах доруобуйаны, дьолу-соргуну, иллээх-эйэлээх олоҕу, оҕолоргут куруук үөрдэ-көтүтэ сырыттыннар!
Алексеева А.Н.,
педагог-библиотекарь. |