Каникул бириэмэтигигэр…
Олох балысханнык сайдар, тэтимнээхтик уларыйар кэмигэр ʏөрэх эйгэтигэр эмиэ саӊаттан саӊа сʏʏрээннэр, сонуннар, ирдэбиллэр, уларыйыылар киирэллэр. Кулун тутар 28 кʏнʏгэр эбии ʏөрэхтээһин чэрчитинэн Сунтаар оройуонун В.Г.Павлов аатынан алын сʏһʏөх оскуолатыгар «Деятельностное содержание начального общего образования в условиях ФГОС: реалии и перспективы» диэн дириӊ ис хоhоонноох региональнай форум буолан ааста. Форумӊа 160 тахса республика араас оскуолаларын алын сʏһʏөх учууталлара кыттыыны ыллылар: Айыы кыһата, куорат 38 №-дээх, Бʏлʏʏ, Yөһээ Бʏлʏʏ, Ньурба, Сунтаар алын сʏһʏөх оскуолалара. Ньурба оройуонуттан биһиги 3 №-дээх оскуола 9 учуутала, Кʏндээдэ орто оскуолатын 4 учуутала, Хаӊалас орто оскуолатын 1 учуутала делегациялаах сылдьан кэллибит.
Форум сыала – соруга ʏөрэтии – иитии боппуруостарыгар саӊаттан саӊа суолу көрдөөһʏн, оҕо сайдарыгар, хаачыстыбалаах билиини ыларыгар сөптөөх усулуобуйаны тэрийии.
Региональнай форум ʏс чаастан турда: эбиэккэ дылы уопсайа 11 аһаҕас уруоктары көрʏʏ, эбиэт кэннэ эбии дьарыктары, маастар кылаастары, тʏмʏккэ Дьокуускай куорат «Айыы кыһата» оскуолатын дириэктэрэ Л.П.Шамаева, ХИФУ информационнай отделын сэбиэдиссэйэ Н.И. Захарова модератордаах төгʏрʏк остуол буолан ааста. Төгʏрʏк остуолга ыытыллыбыт уруоктар, маастар кылаастар ʏрдʏк таһымӊа барбыттарын бэлиэтээтилэр, ʏөрэҕирии эбии сайдарыгар санаа атастастылар.
Бу форумӊа биһиги учууталбыт Апросимова Т.С. математикаҕа 2 кылаастарга, билиӊӊи сайдыы кэмигэр ʏөрэтэр ньыманы туттан аһаҕас уруогу көрдөрөн, регион араас оскуолалартан кэлбит учууталлар кэрэхсэбиллэрин ылла, чахчы бу федеральнай государыстыбаннай ирдэбилгэ эппиэтиир уруок диэн.
Бу улахан суолталаах форум тэриллибит сирэ тоҕо Сунтаар сэлиэнньэтин алын сʏһʏөх оскуолатыгар буолла? Тоҕо диэтэххэ, бу туспа турар алын сʏһʏөх оскуолата - билиӊӊи федеральнай стандартка сөп тʏбэһэр, 500-тэн тахса оҕо бары биир сменаҕа ʏөрэнэр саӊа тутуллубут, ʏөрэҕирии туох баар ирдэбилигэр эппиэттиир таас оскуоланы көрʏʏ уонна көрдөрʏʏ буолар. Оскуола наһаа тупсаҕай оӊоһуулаах, сыста турар улахан арочнай спортивнай заллаах, хас биирдии кылаас оҕо сайдарыгар диэн анал эйгэлээх.
Тʏмʏккэ этиэм этэ - олохпут кэлин кэмӊэ наһаа тʏргэнник сайдарын, олоҕу кытта оҕолорбут тэӊӊэ ʏʏнʏөхтээхтэрин, ʏөрэҕирии, иитии ʏлэтэ онтон хаалыа суохтааҕын бу наһаа туһалаах форум өссө төгʏл көрдөрдө. Ɵссө эбэн эттэххэ, оҕо сайдарыгар аан бастаан ʏчʏгэй усулуобуйа баар буолуохтааҕын бу Сунтаар алын сʏһʏөх оскуолатыгар тэриллибит, 1 сменалаах ʏлэлээһин, ʏөрэнии дакаастыыр. Онон оҕолорбут, төрөппʏттэрбит, учууталларбыт баҕа санаалара туолан оскуолабыт тʏргэн соҕустук тутуллан туспа барарбыт буоллар, Сунтаарга майгынныыр усулуобуйа тэриллэрэ буоллар, кэнэҕэски кэнчээри оҕолорбут билии төрдʏн иӊэринэн, чиӊ билиилээх, сырдык ыралаах, доруобай, төрөөбʏт дойдуларыгар туһалаах ʏлэһит буола ʏʏнʏөхтэрэ – сайдыахтара диэн бигэ эрэллээхпит.
Гагарина Э.Г. – дириэктэри иитэр - ʏөрэтэр ʏлэҕэ солбуйааччы. |